එක්සත් අරාබි එමීර් රාජ්යය සිය රටේ වෙසෙන මිලියන සංඛ්යාත ජනතාව වෙත දුර්ලභ ගණයේ හදිසි ආරක්ෂක අනතුරු ඇඟවීමක් නිකුත් කර තිබේ.
මෙම පණිවිඩය, එමීර් රාජ්යය පුරා සිටින පදිංචිකරුවන්ගේ සහ සංචාරකයින්ගේ ජංගම දුරකථන වෙත ඉහළ ශබ්දයකින් යුත් අනතුරු ඇඟවීමේ නාදයක් සමඟ යොමු කර ඇත.
එක්සත් අරාබි එමීර් රාජ්යයේ අභ්යන්තර කටයුතු අමාත්යාංශය විසින් අරාබි සහ ඉංග්රීසි භාෂා දෙකෙන්ම නිකුත් කළ මෙම නිවේදනය මගින් ජනතාවට උපදෙස් දී ඇත්තේ වහාම ක්රියාත්මක වන පරිදි ආරක්ෂිත ගොඩනැගිල්ලක් තුළට යන ලෙසයි.
එමෙන්ම ජනෙල්, දොරවල් සහ විවෘත ස්ථානවලින් ඈත්ව සිටින ලෙසත්, නිලධාරීන්ගෙන් වැඩිදුර උපදෙස් ලැබෙන තෙක් රැඳී සිටින ලෙසත් එහි සඳහන් වේ.
ඇමරිකාව සහ ඊශ්රායලය විසින් එල්ල කරන ලද ප්රහාරවලට ප්රතිචාර වශයෙන් ඉරානය විසින් ගල්ෆ් කලාපයේ රටවල් වෙත මිසයිල ප්රහාර එල්ල කර ඇත. මින් බොහොමයක් එක්සත් අරාබි එමීර් රාජ්යයේ ගුවන් ආරක්ෂක පද්ධති මගින් සාර්ථකව මැඩපවත්වා ඇති නමුත්, අබුඩාබි සහ ඩුබායි වැනි ප්රධාන නගරවල ප්රබල පිපිරුම් හඬවල් ඇසුණු බව සමාජ මාධ්ය වාර්තා පෙන්වා දෙයි.
මෙම තත්ත්වය හමුවේ ආරක්ෂක පියවරක් ලෙස එමීර් රාජ්යයේ සියලුම පාසල් සහ විශ්වවිද්යාලවල අධ්යයන කටයුතු අන්තර්ජාලය ඔස්සේ (online) සිදු කිරීමට බලධාරීන් තීරණය කර ඇත. මීට අමතරව, ඩුබායි සහ සයීඩ් ජාත්යන්තර ගුවන් තොටුපළවල ගුවන් ගමන් රැසක් ප්රමාද වී හෝ අත්හිටුවා ඇති අතර, එතිහාඩ් (Etihad) ගුවන් සේවය ද අබුඩාබි සිට ක්රියාත්මක වන සිය ගුවන් ගමන් තාවකාලිකව නතර කර තිබේ.
ජාතික හදිසි අවස්ථා සහ ආපදා කළමනාකරණ අධිකාරිය ප්රකාශ කරන්නේ තත්ත්වය පාලනය කර ඇති අතර ජනතාව කලබල නොවිය යුතු බවයි. අනවශ්ය භීතියක් ඇති කර නොගන්නා ලෙසත්, නිල නොවන මූලාශ්ර මගින් ප්රචාරය වන තොරතුරු විශ්වාස නොකර රජයේ නිල පුවත් නාලිකා කෙරෙහි පමණක් අවධානය යොමු කරන ලෙසත් බලධාරීන් වැඩිදුරටත් ඉල්ලා සිටී
