යුද්දයට කලින් ඇරල තිබූ හෝමුස් ඇරගන්න ඇමරිකාව පකිස්තානයට එයි.. කොන්දේසි අරන් ඉරානයත් එයි..

 

ඇමරිකා එක්සත් ජනපදය සහ ඉරානය අතර පවතින යුදමය උණුසුම මධ්‍යයේ, දෙපාර්ශවය අතර නව සාම සාකච්ඡා සඳහා වූ බලාපොරොත්තු දල්වමින් ඉහළ පෙළේ රාජ්‍ය තාන්ත්‍රික නියෝජිතයින් පාකිස්ථානය වෙත පැමිණෙම සිටින බව වාර්තා වේ. 

ඉරාන විදේශ අමාත්‍ය අබ්බාස් අරග්චි දැනටමත් ඉස්ලාමාබාද් වෙත පැමිණ ඇති අතර, ඇමරිකානු ජනාධිපතිවරයාගේ විශේෂ දූතයින් වන ස්ටීව් විට්කොෆ් සහ ජැරඩ් කුෂ්නර් සෙනසුරාදා උදෑසන එහි පැමිණීමට නියමිත බව ධවල මන්දිරය තහවුරු කර ඇත.

 පාකිස්ථානයට පැමිණි ඉරාන විදේශ අමාත්‍යවරයා සඳහන් කළේ ටෙහෙරානය සාකච්ඡා සඳහා විවෘතව සිටින නමුත් එය සිදු විය යුත්තේ නිසි කොන්දේසිවලට යටත්ව බවයි. 

විශේෂයෙන්ම, ඇමරිකා එක්සත් ජනපදය පනවා ඇති නාවික අවහිරය ඉවත් කළ යුතු බවත්, තර්ජන සහ පීඩනය හමුවේ තමන් සාකච්ඡා මේසයට නොපැමිණෙන බවත් ඉරානය අවධාරණය කර ඇත. 

කෙසේ වෙතත්, ඇමරිකානු නියෝජිතයින් සමඟ සෘජු හෝ මුහුණට මුහුණ සාකච්ඡා පැවැත්වීමට මේ දක්වා කිසිදු සැලසුමක් නොමැති බවත්, තම අදහස් පාකිස්ථාන බලධාරීන් හරහා දැනුම් දෙන බවත් ඉරාන විදේශ අමාත්‍යාංශ ප්‍රකාශක එස්මායීල් බගායි පවසා ඇත.

ධවල මන්දිර නියෝජිතයින් වන කුෂ්නර් සහ විට්කොෆ්ගේ පැමිණීම හරහා සාකච්ඡා මට්ටම ඉහළ නැංවීමට ඇමරිකාව උත්සාහ කරන බව පෙනෙන්නට තිබේ. 

ඇමරිකාව ප්‍රධාන වශයෙන් බලාපොරොත්තු වන්නේ හෝමුස් සමුද්‍ර සන්ධිය නැවත විවෘත කරවා ගැනීමටයි. 

මේ අතර, ඇමරිකානු භාණ්ඩාගාර ලේකම් ස්කොට් බෙස්න්ට් ප්‍රකාශ කළේ ඉරාන තෙල් සම්බන්ධයෙන් ලබා දී තිබූ කිසිදු සහනයක් තවදුරටත් දීර්ඝ නොකරන බවයි.

 පාකිස්ථාන බලධාරීන් මෙම සාකච්ඡා සම්බන්ධයෙන් ප්‍රවේශම් සහගත සුබවාදී ආකල්පයක පසුවන අතර, දෙපාර්ශවය අතර පවතින විශාල මතභේද සමනය කිරීමට තිරය පිටුපස දැඩි රාජ්‍ය තාන්ත්‍රික මෙහෙයුමක නිරතව සිටී. 

මීට අමතරව, රුසියාව සහ එක්සත් අරාබි එමීර් රාජ්‍යය ද කලාපීය අර්බුදය විසඳීම සඳහා වහාම සාකච්ඡා ආරම්භ කරන ලෙස ඉල්ලා ඇත.

මෙසේ ක්‍රියාත්මක වන අතරතුර, දකුණු ලෙබනනයේ ඊශ්‍රායල ප්‍රහාර හේතුවෙන් පුද්ගලයින් හය දෙනෙකු ජීවිතක්ෂයට පත්ව ඇති බව වාර්තා වේ.