ජේ.ආර්.ගේ සැබෑ බෑණා රනිල් නොව අනුර කුමාරයි" - විමල්

 

මෙතෙක් කල් හිටපු ජනාධිපති ජේ.ආර්. ජයවර්ධන මහතාගේ දේශපාලන උරුමක්කාරයා හෝ "බෑණා" ලෙස සැලකුණේ රනිල් වික්‍රමසිංහ මහතා වුවද, දැන් තමන් සිතන්නේ එම ස්ථානයට වඩාත් ගැලපෙන්නේ අනුර කුමාර දිසානායක මහතා බව ජාතික නිදහස් පෙරමුණේ නායක හිටපු අමාත්‍ය විමල් වීරවංශ මහතා පවසයි.

ජන හමුවක් අමතමින් ඒ මහතා අවධාරණය කළේ රට තුළ ඉදිරියේදී නිර්මාණය වීමට නියමිත බරපතළ තත්ත්වය පිළිබඳව ආණ්ඩුවට හෝ සම්ප්‍රදායික විපක්ෂයට නිසි අවබෝධයක් නොමැති බවයි.

ගල් අඟුරු හිඟය සහ විදුලිය උත්පාදනයට අවශ්‍ය ජලය නොමැති වීම හේතුවෙන් ඉදිරියේදී දැවැන්ත බලශක්ති අර්බුදයකට මුහුණ දීමට සිදුවන බව වීරවංශ මහතා මෙහිදී අනතුරු ඇඟවීය.

මෙයට අමතරව රටේ ආහාර නිෂ්පාදනය බිඳ වැටීම සහ විදේශ විනිමය හිඟය හේතුවෙන් එල්ල වන පීඩනය හමුවේ ජන ජීවිතය තවදුරටත් අසීරු වනු ඇති බව ඔහු පෙන්වා දුන්නේය.

රට මෙවැනි අර්බුදයකට ලක්ව ඇති මොහොතක, බාහිර බලවේග මැදිහත් වී තමන්ට අවශ්‍ය දේශපාලන වෙනස්කම් සිදු කිරීමට උත්සාහ කරනු ඇති බව වීරවංශ මහතා සඳහන් කළේය.

වත්මන් පාලකයන් තවදුරටත් ආරක්ෂා කළ නොහැකි බව වැටහුණහොත්, එම බලවේග වෙනත් විකල්ප කරා යොමු වනු ඇති බව ඔහුගේ අදහසයි.

නේපාලයේ පැවති සම්ප්‍රදායික පක්ෂ පසෙකට තල්ලු කරමින් රැප් ගායකයෙකු බලයට පැමිණීමේ සිද්ධිය උදාහරණයට ගනිමින් ඔහු කියා සිටියේ, ලෝකයේ සිදුවන මෙවැනි දේශපාලන පෙරළි පිළිබඳව මෙරට සම්ප්‍රදායික දේශපාලන කතිකාව තුළ කිසිදු සාකච්ඡාවක් නොමැති වීම කණගාටුදායක බවයි.