කුමාර ජයකොඩි ඇමතිකමෙන් ඉවතට..?

බලශක්ති අමාත්‍ය කුමාර ජයකොඩි මහතාට එරෙහිව ඉදිරිපත් වූ විශ්වාසභංග යෝජනාව පරාජයට පත් වුවද, ඔහු දරන අමාත්‍ය ධුරයෙන් ඔහුව ඉවත් කිරීමට අවධානය යොමුව ඇති බව වාර්තා වේ.

බාල ගල් අඟුරු මෙරටට ගෙන්වීම හරහා රජයට මූල්‍ය අලාභයක් සිදු කිරීම ඇතුළු චෝදනා රැසක් අමාත්‍යවරයාට එරෙහිව එල්ල වී තිබේ.

මෙම චෝදනා හමුවේ අමාත්‍යවරයා තවදුරටත් තනතුරේ රඳවා තබා ගැනීම ආණ්ඩුවේ පැවැත්මට අහිතකර ලෙස බලපානු ඇති බවට පාලක පක්ෂයේ අභ්‍යන්තර පාර්ශ්වයන් රජයට කරුණු පෙන්වා දී ඇත.

පසුගියදා අශෝක රන්වල කථානායකවරයා සම්බන්ධයෙන් ගත් තීරණය මෙන්, මෙහිදීද කඩිනම් පියවරක් ගැනීම හරහා ආණ්ඩුවේ ප්‍රතිරූපය රැකගත යුතු බව එම පාර්ශ්වයන්ගේ අදහසයි.

පැලවත්ත පක්ෂ මූලස්ථානයේදී පසුගිය දිනවල පැවැති සාකච්ඡාවලදී ද මෙම ඉල්ලීම අවධාරණය වී ඇති අතර, අමාත්‍යවරයාට එල්ල වන චෝදනා සම්බන්ධයෙන් දිගින් දිගටම පිළිතුරු දීමට සිදුවීම බරපතළ ගැටලුවක් බව රජයේ ප්‍රබල අමාත්‍යවරයකු එහිදී ප්‍රකාශ කර ඇත.

සිංහල අලුත් අවුරුද්දෙන් පසුව සිදු කිරීමට නියමිත කැබිනට් සංශෝධනයේදී මෙම විෂය පථයේ වෙනසක් සිදුවනු ඇතැයි පක්ෂ ආරංචි මාර්ග සඳහන් කරයි.

නොරොච්චෝල ලක්විජය බලාගාරයට බාල ගල් අඟුරු සැපයීමේ ටෙන්ඩර් ක්‍රියාවලිය තුළ බරපතළ අක්‍රමිකතා සිදුව ඇති බව ජාතික විගණන කාර්යාලය නිකුත් කළ විශේෂ විගණන වාර්තාවකින් ද තහවුරු වී තිබේ