පාර්ලිමේන්තුව විසුරුවා හැරීමට සාකච්චාවක්...?

 

වත්මන් පාර්ලිමේන්තුව විසුරුවා හැරීම සඳහා ආණ්ඩුව තුළ රහසිගත සාකච්ඡාවක් සිදුවෙමින් පවතින බව පිවිතුරු හෙළ උරුමයේ නායක, හිටපු කැබිනට් අමාත්‍ය උදය ගම්මන්පිල මහතා අනාවරණය කරයි.

පැලවත්ත සහ ජනාධිපති ලේකම් කාර්යාලයෙන් තමන්ට ලැබී ඇති තොරතුරු අනුව, ජනාධිපතිවරයාගේ කුස්සි කැබිනෙට්ටුව නියෝජනය කරන දැවැන්ත ව්‍යාපාරිකයින් සහ උපදේශකයින් පිරිසක් අතර මෙම සාකච්ඡාව සිදුව ඇති බව ඒ මහතා පවසයි.

ගම්මන්පිල මහතා පවසන පරිදි, ආණ්ඩුව බලයට පත්ව වසර එකහමාරක් වැනි කෙටි කාලයක් තුළ බරපතල ලෙස කුණු වී ඇති අතර, අත්දැකීම් නොමැති කණ්ඩායමක් සමඟ රට කරගෙන යාම ජනාධිපතිවරයාට ගැටලුවක් වී ඇත. 

විශේෂයෙන්ම මුදල් අමාත්‍යාංශයේ ලේකම් ධුරය වැනි වැදගත් තනතුරු පිරවීමට සුදුසු පිරිසක් නොමැති වීමත්, ආණ්ඩුවේ ඡන්ද පදනම සීඝ්‍රයෙන් පහත වැටීමත් මෙයට ප්‍රධාන හේතු වී තිබේ.

මෙහිදී ආණ්ඩුව 2001 වසරේ එවකට සිටි චන්ද්‍රිකා කුමාරතුංග ජනාධිපතිනිය අනුගමනය කළ උපාය මාර්ගයම ක්‍රියාත්මක කිරීමට සැරසෙන බව හිටපු ඇමතිවරයා සිය අන්තර්ජාල නාලිකාවේ සාකච්චාවකට එක්වෙමින් පෙන්වා දෙයි.

එනම්, පාර්ලිමේන්තුව විසුරුවා හැර බලය විපක්ෂයට ලබා දී, ජනාධිපතිවරයා සතු විධායක බලතල සහ වෘත්තීය සමිති ක්‍රියාකාරීත්වය යොදා ගනිමින් විපක්ෂයේ ආණ්ඩුව කඩාකප්පල් කිරීමයි.

එමගින් ජනතාවට විපක්ෂය එපා කරවා නැවත බලය ලබා ගැනීම ඔවුන්ගේ අරමුණ බව ගම්මන්පිල මහතා වැඩිදුරටත් සඳහන් කරයි.

ආණ්ඩුක්‍රම ව්‍යවස්ථාවට අනුව වසර දෙකහමාරක් ගතවන තුරු ජනාධිපතිවරයාට පාර්ලිමේන්තුව විසුරුවා හැරීමට බලයක් නොමැත. 

ඒ අනුව, වත්මන් 17 වන පාර්ලිමේන්තුව ප්‍රථම වරට රැස්වූ 2024 නොවැම්බර් 21 වන දින සිට වසර දෙකහමාරක් සම්පූර්ණ වන 2027 මැයි මස 21 වනදා පාර්ලිමේන්තුව විසුරුවා හැරීමට ආණ්ඩුවේ අභ්‍යන්තර සාකච්ඡාවලදී අවධානය යොමු වී ඇති බව ගම්මන්පිල මහතා අනාවරණය කළේය.

එසේ නොකළහොත් ජාතික ජන බලවේගය සම්පූර්ණයෙන්ම දේශපාලනිකව හේදී යාමට ඉඩ ඇති බවට ඔවුන් බිය වී සිටින බවද ඒ මහතා වැඩිදුරටත් පවසා සිටියි.