පිල්ලෙයාන්ට පාස්කු ප‍්‍රහාරය ගැන කිසිම චෝදනාවක් නෑ.. අධිකරණයේදී හෙලිවේ..

අපරාධ පරීක්ෂණ දෙපාර්තමේන්තුව භාරයේ දින 359ක් රඳවා තබාගෙන සිටි සිවනේසතුරෙයි චන්ද්‍රකාන්තන් හෙවත් පිල්ලෙයාන්ට එරෙහිව පාස්කු ඉරිදා බෝම්බ ප්‍රහාරයට අදාළ කිසිදු චෝදනාවක් මෙතෙක් ඉදිරිපත් කර නොමැති බව හිටපු අමාත්‍ය උදය ගම්මන්පිල මහතා පවසයි.

මීට වසරකට පෙර පිල්ලෙයාන් අත්අඩංගුවට ගන්නා අවස්ථාවේදී, ඔහු පාස්කු ප්‍රහාරයට සම්බන්ධ බවට ජනාධිපතිවරයා මෙන්ම එවකට පොලිසිය භාර අමාත්‍ය ආනන්ද විජයපාල මහතාද පාර්ලිමේන්තුවේදී සහ මඩකලපුවේ පැවති රැස්වීම්වලදී ප්‍රකාශ කළ බව ගම්මන්පිල මහතා සිහිපත් කළේය. 

කෙසේ වෙතත්, වසරක රඳවා තබා ගැනීමෙන් පසු අධිකරණයට ඉදිරිපත් කළ අවස්ථාවේදී ඔහුට එරෙහිව එවැනි කිසිදු චෝදනාවක් ගොනු කිරීමට බලධාරීන් අපොහොසත් වී ඇති බව ඒ මහතා පෙන්වා දුන්නේය.

අපරාධ පරීක්ෂණ දෙපාර්තමේන්තුව අධිකරණයට කරුණු ඉදිරිපත් කර ඇත්තේ කොටි ත්‍රස්තවාදීන්ට එරෙහිව සටන් කිරීම දඬුවම් ලැබිය යුතු වරදක් ලෙස සලකා බව ගම්මන්පිල මහතා මෙහිදී  ප්‍රකාශ කළේය. ත්‍රස්තවාදය වැළැක්වීමේ පනත යටතේ ඔහුව අත්අඩංගුවට ගැනීමට අපරාධ පරීක්ෂණ දෙපාර්තමේන්තුවට නීත්‍යානුකූල බලයක් නොමැති බැවින්, ඔහුව නිදහස් කරන ලෙස තමන් අධිකරණයෙන් ඉල්ලා සිටි බවද ඔහු සඳහන් කළේය.

නඩුව සලකා බැලූ ගල්කිස්ස මහේස්ත්‍රාත් පසන් අමරසිංහ මහතා, අපරාධ පරීක්ෂණ දෙපාර්තමේන්තුවේ චෝදනා සම්බන්ධයෙන් නීතිපති උපදෙස් පැතිය යුතු බව දැනුම් දුන්නේය. ඒ අනුව නීතිපති උපදෙස් ලැබෙන තෙක් සැකකරු රක්ෂිත බන්ධනාගාරගත කිරීමට නියෝග කෙරිණි.

මෙම තීන්දුවට එරෙහිව ඉදිරියේදී අභියාචනාධිකරණය හමුවේ අභියාචනයක් ඉදිරිපත් කිරීමට කටයුතු කරන බවද හිටපු අමාත්‍ය උදය ගම්මන්පිල මහතා වැඩිදුරටත් අවධාරණය කළේය.

නැගෙනහිර විශ්වවිද්‍යාලයේ හිටපු උපකුලපති මහාචාර්ය සිවසුබ්‍රමනියම් රවීන්ද්‍රනාත් මහතා පැහැරගෙන ගොස් අතුරුදන් කිරීමේ සිද්ධියට අදාළව පසුගිය වසරේ  මඩකලපුවේදී මොහුව අත්අඩංගුවට ගනු ලැබීය. ඉන් අනතුරුව දින 359ක කාලයක් රඳවා තබා ගැනීමේ නියෝග මත අපරාධ පරීක්ෂණ දෙපාර්තමේන්තුව භාරයේ සිටි ඔහු, (02) කොළඹ අධිකරණ වෛද්‍ය නිලධාරියා හමුවට ඉදිරිපත් කිරීමෙන් පසු ගල්කිස්ස මහේස්ත්‍රාත් අධිකරණය වෙත ඉදිරිපත් කෙරිණි