ත‍්‍රිවිල් ගාස්තු කිලෝමීටරයට 130 කරයි..

රජය විසින් ඉන්ධන මිල යළිත් වරක් ඉහළ දැමීමත් සමඟ ත්‍රීරෝද රථ කර්මාන්තය දැඩි අර්බුදයකට ලක්ව ඇති බැවින්, ගාස්තු සංශෝධනයක් සිදු කිරීමට සිදුවන බව ජාතික ඒකාබද්ධ ත්‍රීරෝද රථ රියදුරන්ගේ හා කර්මාන්තකරුවන්ගේ සංගමය පවසයි.

එම සංගමයේ ප්‍රධාන ලේකම් එල්. රෝහණ පෙරේරා මහතා සඳහන් කළේ, අද සිට ක්‍රියාත්මක වන පරිදි ඉන්ධන මිල රුපියල් 24කින් ඉහළ දමා ඇති බවයි.

මීට පෙර අවස්ථාවක ද ඉන්ධන මිල රුපියල් 12කින් ඉහළ දැමූ නමුත් එම අවස්ථාවේදී ගාස්තු සංශෝධනයක් සිදු නොකළ බවත්, ඒ අනුව මේ වන විට සමස්තයක් ලෙස ඉන්ධන මිල රුපියල් 36කින් පමණ ඉහළ ගොස් ඇති බවත් ඔහු පෙන්වා දුන්නේය.

පවතින තත්ත්වය හමුවේ පළමු කිලෝමීටරය සඳහා අය කරන ගාස්තුව අවම වශයෙන් රුපියල් 130ක් දක්වා ඉහළ දැමිය යුතු බවට යෝජනාවක් ඉදිරිපත් කිරීමට බලාපොරොත්තු වන බව ලේකම්වරයා පැවසීය. ඉන්ධන මිලට අමතරව ග්‍රීස් සහ ඔයිල් මිල ද අසීමිත ලෙස ඉහළ ගොස් ඇති අතර, මේ පිළිබඳව සොයා බැලීමට පාරිභෝගික අධිකාරිය කටයුතු නොකිරීම ගැටලුවක් බව ඔහු වැඩිදුරටත් සඳහන් කළේය.

ගාස්තු වැඩි කිරීමට සිදුවුව ද, පාරිභෝගිකයා ආරක්ෂා කර ගැනීම තම සංගමයේ අරමුණ බව රෝහණ පෙරේරා මහතා අවධාරණය කළේය.,

අධික ලෙස ගාස්තු ඉහළ දැමීමෙන් පාරිභෝගිකයන් ත්‍රීරෝද රථ සේවාවෙන් ඈත් විය හැකි බවත්, එබැවින් මිල පාලන කමිටුව සමඟ සාකච්ඡා කර සාධාරණ මුදලක් තීරණය කළ යුතු බවත් ඔහු පැවසීය.

එසේම ඇතැම් ජංගම දුරකථන යෙදුම්  මගින් ක්‍රියාත්මක වන සමාගම් රියදුරන්ගේ මහන්සියෙන් විශාල කොමිස් මුදලක් ලබා ගනිමින් ඔවුන්ව සූරාකන බවට ද ඔහු චෝදනා කළේය.

ත්‍රීරෝද රථ රියදුරන් මුහුණ දෙන මෙම ගැටලු පිළිබඳව සාකච්ඡා කිරීමට ජනාධිපතිවරයා හමුවීමට බලාපොරොත්තු වන බවත්, මාර්ග ප්‍රවාහන අධිකාරිය මැදිහත් වී පළාත් නවයටම පොදු වූ සාධාරණ ගාස්තු ප්‍රතිපත්තියක් වහාම සකස් කළ යුතු බවත් ජාතික ඒකාබද්ධ ත්‍රීරෝද රථ රියදුරන්ගේ හා කර්මාන්තකරුවන්ගේ සංගමය රජයෙන් ඉල්ලා සිටියි.