ඩොලරය වැඩිවීම හා බද්ද නිසා වාහන මිල ලොකුවට වැඩිවෙයි.. Vezel ලක්‍ෂ 12කින්.. Raize ලක්‍ෂ 10කින්...

 වාහන මත පනවා ඇති නව බදු සංශෝධන සහ ඇමරිකානු ඩොලරයට සාපේක්ෂව රුපියල ශීඝ්‍රයෙන් අවප්‍රමාණය වීම හේතුවෙන් ඉදිරියේදී මෙරට වාහන මිල විශාල ලෙස ඉහළ යනු ඇති බව වාහන ආනයනකරුවන් අනතුරු අඟවයි.

වාහන ආනයනකරුවන්ගේ සංගමයේ ඉන්දික සම්පත් මෙරෙන්චිගේ මහතා සඳහන් කරන්නේ පවතින තත්ත්වය මත වාහනයක් ආනයනය කිරීමේ පිරිවැය 110% කින් පමණ ඉහළ ගොස් ඇති බවයි.

මූලාශ්‍ර වලට අනුව, මෑතකදී රුපියලට සාපේක්ෂව ඩොලරයේ අගය රුපියල් 300 සිට 330 දක්වා පමණ ඉහළ යාම සහ නව බදු ගණනය කිරීම්වල වෙනස්කම් මෙම මිල ඉහළ යාමට ප්‍රධාන හේතු වී තිබේ.

මේ හේතුවෙන් ඉදිරි සති කිහිපය තුළ වෙළඳපොළට එන වාහනවල මිල ගණන් පහත පරිදි ඉහළ යා හැකි බව ඔහු පෙන්වා දෙයි.

• Honda Vezel: මිල රුපියල් ලක්ෂ 12කින් පමණ ඉහළ යනු ඇත.
• Toyota Raize: රුපියල් ලක්ෂ 7ත් 10ත් අතර ප්‍රමාණයකින් මිල ඉහළ යාමට නියමිතය.
• Toyota Yaris: මිල රුපියල් ලක්ෂ 4ත් 5ත් අතර අගයකින් වැඩි වනු ඇත.
• Land Cruiser Jeep: බදු මුදල පමණක් ලක්ෂ 18කින් වැඩි වන අතර, මුළු මිල රුපියල් ලක්ෂ 30කින් පමණ ඉහළ යනු ඇතැයි ගණන් බලා තිබේ.
• Toyota Prado 250: රුපියල් ලක්ෂ 600ක්ව පැවති මිල රුපියල් ලක්ෂ 635 - 640 දක්වා ඉහළ යාමට නියමිතය.

මෙම තත්ත්වය හමුවේ අලුතින් වාහනයක් ආනයනය කිරීමට වඩා දැනට වෙළඳපොළේ පවතින වාහනයක් මිලදී ගැනීම පාරිභෝගිකයාට වාසිදායක වන බව මෙරෙන්චිගේ මහතා පවසයි.

ලෝක වෙළඳපොළේ බොරතෙල් මිල ඉහළ යාම, ගෝලීය යුදමය වාතාවරණය සහ විදේශ ප්‍රේෂණ ලැබීම සීමා වීම වැනි කරුණු ද මෙම ආර්ථික පීඩනයට බලපා ඇති බව පෙන්වා දෙන ඔහු, ඉදිරි සති දෙක තුන තුළ වාහන මිල තවදුරටත් ඉහළ යා හැකි බව අවධාරණය කළේය.

විශේෂයෙන්ම ජපානයෙන් ආනයනය කරන වාහන සඳහා ඩොලරය සහ යෙන් මුදල අතර පවතින අස්ථාවරත්වය හේතුවෙන් මීට පෙර පැවති වාසියද දැන් අහිමි වී ගොස් තිබේ