දෙවියෙක් චුත වෙන්න ලංවෙද්දී ඔහුගේ කිහිලිවලට දාඩිය දානවා.. කට ගඳ ගහනවා.. ශරීරයෙන් දුර්ගන්ධය හමනවා..

 වත්මන් දේශපාලන පිටියේ තම ප්‍රතිවාදීන් පත්ව සිටින තත්ත්වය, දෙවියෙකු දිව්‍ය ලෝකයෙන් චුත වීමට ආසන්න වන විට පෙන්නුම් කරන ලක්ෂණවලට සමාන බව ජාතික ජන බලවේගයේ පාර්ලිමේන්තු මන්ත්‍රී දේවානන්දා සුරවීර මහතා පවසයි.

මාධ්‍ය අමතමින් ඒ මහතා මේ බව කියා සිටියේය.

පැරණි දේශපාලන ක්‍රමය අවසන් වීමට ආසන්න බව පෙන්වා දෙමින් මන්ත්‍රීවරයා මෙසේ පැවසීය.

"දෙවියෙක් චුත වෙන්න ලංවෙද්දී ඔහුගේ කිහිලිවලට දාඩිය දානවා, කට ගඳ ගහනවා, ශරීරයෙන් දුර්ගන්ධය හමනවා. දැන් මේ සිද්ධ වෙන්නෙත් ඒ වගේ දෙයක්. ජනතාවගේ ශ්‍රමයෙන් ගොඩනගාගත්තු ඔවුන්ගේ දිව්‍ය ලෝකය දැන් ඔවුන්ගේ හිස මතටම කඩා වැටෙන යුගය උදා වෙලා."

තම පක්ෂයේ දේශපාලන ගමන් මග තුළ කිසිදු රහසිගත ගනුදෙනු හෝ 'ඩීල්' නොමැති බව අවධාරණය කළ මන්ත්‍රීවරයා, මහා වෘක්ෂයක් කපා ඉවත් කරන විට ඉන් විසිවන කැබලි දෙස බලා බල්ලන් බිරුවද, 'ජාතික ජන බලවේගය' නමැති ඇතා ඒ කිසිවකින් කලබල නොවන බව ද සඳහන් කළේය.

ජනාධිපතිවරයා මීට පෙර සඳහන් කළ දූෂණ වංචා පිළිබඳ 'ෆයිල්' සහ චෙක්පත් අංක පිළිබඳව මාධ්‍යවේදීන් නැගූ ප්‍රශ්නවලට පිළිතුරු දෙමින් ඔහු කියා සිටියේ, ඒ සියල්ලටම කාලය විසින් පිළිතුරු ලබා දෙනු ඇති බවයි.

"යටගිය කුණු කන්දල් හාර හාරා ඇවිස්සීමේ අවශ්‍යතාවක් නැහැ. ඒ සම්බන්ධ පරීක්ෂණ කටයුතු සිදුවෙමින් පවතිනවා. ජනතාවගේ බලාපොරොත්තු ඉටු කරමින් ඒ සියල්ල ඉදිරියේදී හෙළිදරව් වනු ඇති" යැයි දේවානන්දා සුරවීර මහතා වැඩිදුරටත් ප්‍රකාශ කළේය.