ලෝක කුසලානයේ ශ‍්‍රී ලංකා ගමන නිමයි.. නවසීලන්තය හමුවේ දැවැන්ත පරාජයක්..

 

නවසීලන්තය සහ ශ්‍රී ලංකාව අතර පැවති විස්සයි විස්ස ලෝක කුසලාන සුපිරි 8 වටයේ තරගයෙන් ශ්‍රී ලංකාව ලකුණු 61ක දැවැන්ත පරාජයක් ලැබීමත් සමඟ ඔවුන්ගේ ඉදිරි ගමන අවසන් වන තත්වයක් උදා වී ඇත.

නවසීලන්තය නියමිත පන්දුවාර 20 අවසානයේ කඩුලු 7ක් දැවී ලකුණු 168ක් ලබා ගත්තේය. 

මිචෙල් සැන්ට්නර් (47) සහ කෝල් මැකොන්චි (නොදැවී 31) පිත්තෙන් කැපී පෙනෙන දස්කම් දැක්වූහ. පන්දු යැවීමේදී මහීෂ් තීක්ෂණ සහ දුෂ්මන්ත චමීර කඩුලු 3 බැගින් දවාලමින් දස්කම් දැක්වුවද, ශ්‍රී ලංකා පිතිකරුවන්ට එම අභියෝගය ජය ගැනීමට නොහැකි විය.

පිළිතුරු ඉනිම ක්‍රීඩා කළ ශ්‍රී ලංකා කණ්ඩායමට පන්දුවාර 20 අවසානයේ ලබා ගත හැකි වූයේ කඩුලු 8ක් දැවී ලකුණු 107ක් පමණි. රචින් රවීන්ද්‍ර ලකුණු 27කට කඩුලු 4ක් දවාලමින් ශ්‍රී ලංකා ඉනිම සුනුවිසුනු කළේය.

ප්‍රසාද ලකුණු සටහනට අනුව ශ්‍රී ලංකාවේ තත්ත්වය ඉතා අසීරු මට්ටමක පවතී. ශ්‍රී ලංකා කණ්ඩායමට දැන් ඉතිරිව ඇත්තේ පකිස්තාන කණ්ඩායම සමඟ පැවැත්වෙන තරගය පමණි.

ශ්‍රී ලංකාව දැනටමත් තරග දෙකක් පරාජය වී ප්‍රසාද ලකුණු සටහනේ අවසන් ස්ථානයේ පසුවේ. එංගලන්තය (ලකුණු 4) සහ නවසීලන්තය (ලකුණු 3) දැනටමත් ඉදිරියෙන් සිටින බැවින්, ශ්‍රී ලංකාවට අවසන් පූර්ව වටයට පිවිසීමට ඇති අවස්ථාව ප්‍රායෝගිකව අවසන් වී ඇත.

ශ්‍රී ලංකාවේ NRR අගය -2.800 වැනි ඉතා අඩු මට්ටමක පවතින බැවින්, අවසන් තරගය විශාල පරතරයකින් ජය ගත්තද අනෙකුත් කණ්ඩායම්වල ප්‍රතිඵල මත රැඳී සිටීමට සිදුවේ. නමුත් ප්‍රමුඛ කණ්ඩායම් දෙක දැනටමත් ලබා ඇති ප්‍රසාද ලකුණු සංඛ්‍යාව හමුවේ ශ්‍රී ලංකාවට ඉදිරියට යාම කළ නොහැක්කකි.

පකිස්තාන කණ්ඩායම සමඟ පැවැත්වෙන අවසන් තරගය ජයග්‍රහණය කිරීම ශ්‍රී ලංකාවට ගෞරවයක් සහිතව තරගාවලිය නිමා කිරීමටත්, ප්‍රසාද ලකුණු සටහනේ අවසන් ස්ථානයෙන් මිදීමටත් වැදගත් වනු ඇත.