අද නිරාගමිකරණය බරපතලයි.. ගස් ගල් පිළිමවලට වඳින අය ගෝත්‍රිකයෝ කියා හඳුන්වනවා..

 

වත්මන් රජය ආගම්වාදය, ජාතිවාදය ඔඩුදුවන ආකාරයෙන් කටයුතු කොට රට අරාජික කිරීමට උත්සහ කරන්නේදැයි සාධාරණ සැකයක් මතු වන බව හිටපු අමාත්‍ය විජේදාස රාජපක්ෂ පවසයි.

හෙතෙම මේ බව පැවසූයේ මහනුවරදී මාධ්‍ය හමුවේ අදහස් පළ කරමිනි.

මෙහිදී ඔහු පැවැසූයේ ත්‍රිකුණාමලයේ, තිස්ස විහාරයේ වැනි ගැටලු එක දුරකථන ඇමතුමකින් විසඳීමේ හැකියාව තිබියදී රජය එය දිගින් දිගටම ඇදගෙන යාමෙන් මෙම තත්ත්වය වඩාත් තහවුරු වන බවයි. 

මෙහිදී තවදුරටත් අදහස් පළ කළ ඒ මහතා මෙසේද පැවසීය.

"පසුගිය වසර කීපය පුරා මාලිමාවට සම්බන්ධ දේශපාලන ක්‍රියාකාරීන් රට පුරා වෛරයේ බීජ රෝපණය කළා. දැන් ඒ අය මේ රෝපණය කළ බීජ වල අස්වැන්න නෙළනවා. ඒ මදිවට පොලිසියට, නීතිපතිට හා අදාළ රාජ්‍ය ආයතනවලට ස්වාධීනව කටයුතු කරන්න දෙන්නේ නෑ. මේ ආයතන රජයේ බලපෑම මත දේශපාලනික තීන්දු තමයි ගන්නේ. වැරදිකරුවන් අත්අඩංගුවට ගැනීම සම්බන්ධයෙන් අපේ විරෝධතාවයක් නෑ. නමුත් නිර්දය ආකාරයෙන් දේශපාලකයන් දඩයම් කිරීම අපිට පිළිගන්න බෑ.

 අද බරපතළ ආකාරයෙන් නිරාගම්කරණය සිදුවෙමින් පවතිනවා. ගස් ගල් පිළිමවලට වඳින අය ගෝත්‍රිකයෝ වශයෙන් හඳුන්වනවා. අපි මේ රජයෙන් අහන්න කැමතියි එදා මැතිවරණ අවස්ථාවේ ජන්දය ලබා දුන් 68 ලක්ෂයම ගෝත්‍රිකයෝද කියලා. ත්‍රස්ත විරෝධී පනතක් කෙටුම්පත් කරලා පාර්ලිමේන්තුව ඉදිරිපත් කරන්න හදපු අවස්ථාවේ වර්තමාන ජනාධිපති ඇතුළු ජනතා විමුක්ති පෙරමුණේ මන්ත්‍රිවරු ඊට දිගින් දිගටම විරුද්ධ වුණා. 

යුද්ධයක් නොමැතිව ත්‍රස්ත විරෝධී පනතක් අවශ්‍ය නැහැ කියලා. එදා එහෙම කියපු අය අද පාලකයන්ට බරපතළ ආකාරයෙන් බලතල සහිත ජනතාවගේ වගේම මාධ්‍යයේ නිදහස අහුරන අලුත් ත්‍රස්ත පනතක් කෙටුම්පත් කරලා ඉදිරිපත් කරලා තියෙනවා. මේක හරියට අර කවුරු හරි සකස් කරපු නිබන්ධනයක් වගේ. මේක ගෙනාවොත් ජනතාවගේ ස්වාධීනත්වය නිදහස නැති වෙනවා. 

මේ අය මුලින්ම කරන්නේ ජනමාධ්‍ය පාලනය කරන එකයි. ජනමාධ්‍ය නිදහස නැති කළා කියන්නේ රටේ ජනතාවගේ නිදහස නැති කරන එකයි. ඒ නිසා දිනෙන් දින පිරිහෙන මේ ආණ්ඩුවට එරෙහි වන්නන් මර්දනය කරලා බලය රැකගන්නයි මේ නව ත්‍රස්ත විරෝධී පනත ගේන්නේ"

කමල් සුරවීර- මහනුවර