එයා බස් ගණුදෙනුවේ අල්ලසින් කෝටි හයක් මහින්ද අතට ගිහින් දුන්නා..- හිටපු CEO කියයි..

 

මතභේදාත්මක 2015 එයාර්බස් (Airbus) ගනුදෙනුවට අදාළව අල්ලස් ලෙස ලබාගත් රුපියල් මිලියන 60ක මුදලක් එවකට හිටපු ජනාධිපති මහින්ද රාජපක්ෂ මහතා වෙත ලබාදුන් බව ශ්‍රී ලංකන් ගුවන් සේවයේ හිටපු ප්‍රධාන විධායක නිලධාරී කපිල චන්ද්‍රසේන මහතා ප්‍රකාශ කර ඇති බව අල්ලස් හෝ දූෂණ චෝදනා විමර්ශන කොමිෂන් සභාව අද (19) කොළඹ මහේස්ත්‍රාත් අධිකරණයට දැනුම් දුන්නේය.

අදාළ සිද්ධිය සම්බන්ධයෙන් සැකකරු ලබාදුන් ප්‍රකාශයකට අනුව, තමන් වෙත ලැබුණු රුපියල් මිලියන 60ක මුදල අවස්ථා තුනකදී හිටපු විධායක ජනාධිපති මහින්ද රාජපක්ෂ මහතා වෙත ලබාදුන් බවත්, තවත් රුපියල් මිලියන 20ක මුදලක් හිටපු සිවිල් ගුවන් සේවා අමාත්‍ය ප්‍රියංකර ජයරත්න මහතා වෙත ලබාදුන් බවත් කොමිෂන් සභාව අධිකරණය හමුවේ අනාවරණය කළේය.

සැකකරුගේ බිරිඳගේ නමින් බෲනායි රාජ්‍යයේ ව්‍යාජ සමාගමක් පිහිටුවා සිංගප්පූරුවේ බැංකු ගිණුමක් පවත්වාගෙන ගොස් ඇත.

යුරෝපීය ගුවන් අභ්‍යවකාශ ආරක්ෂක සමාගමෙන් (EADS) අල්ලස් වශයෙන් යුරෝ $1,454,645.54$ ක මුදලක් මෙම ගිණුම හරහා ලබාගෙන ඇති බවට චෝදනා එල්ල වී තිබේ.

අදාළ මුදල් පසුව ඕස්ට්‍රේලියාවේ Commonwealth Bank සැකකරුගේ ගිණුමට බැර කර ඇති අතර, එම මුදලින් කොටසක් ශ්‍රී ලංකන් ගුවන් සේවයේ අධ්‍යක්ෂවරයෙකුට සහ රජයේ උසස් නිලධාරීන් කිහිප දෙනෙකුට බෙදා දී ඇති බවද අනාවරණය විය.

මෙම චෝදනා මත අත්අඩංගුවට ගෙන සිටින සැකකරු ලබන අප්‍රේල් මස 02 වනදා දක්වා තවදුරටත් රක්ෂිත බන්ධනාගාරගත කරන ලෙස කොළඹ ප්‍රධාන මහේස්ත්‍රාත් අසංග එස්. බෝදරගම මහතා නියෝග කළේය.

.