අල්ලස් කොමිසම කපිල චන්ද්‍රසේන මිය යන හැටි කලින්ම කියලා.. මිනී මැරුමක් ලෙස සලකා පරීක්‍ෂණ කල යුතුයි..

 ශ්‍රී ලන්කන් ගුවන් සේවයේ හිටපු ප්‍රධාන විධායක නිලධාරී කපිල චන්ද්‍රසේන මහතාගේ මරණය සම්බන්ධයෙන් අල්ලස් කොමිසමේ නිලධාරීන්ගේ මැදිහත්වීම සහ බලපෑම පිළිබඳව විධිමත් ස්වාධීන පරීක්ෂණයක් පවත්වන ලෙස පිවිතුරු හෙළ උරුමයේ නායක, හිටපු අමාත්‍ය උදය ගම්මන්පිල මහතා බලධාරීන්ගෙන් ඉල්ලා සිටියි.

මරණයට සති කිහිපයකට පෙර කපිල චන්ද්‍රසේන මහතා විසින් ලබා දී ඇති දිවුරුම් ප්‍රකාශයක් පිළිබඳව මාධ්‍ය වාර්තා උපුටා දක්වමින් ගම්මන්පිල මහතා පෙන්වා දෙන්නේ, අල්ලස් කොමිසම අපේක්ෂා කරන ආකාරයට සාක්ෂි ලබා නොදුනහොත් "ගෙල වැලලා ගැනීමට සිදුවනු ඇති" බවට එම කොමිසමේ නිලධාරීන් ඔහුට බලපෑම් කර ඇති බවයි. 

විශේෂයෙන්ම මහින්ද රාජපක්ෂ සහ නාමල් රාජපක්ෂ යන මහත්වරුන්ට එරෙහිව ප්‍රකාශ ලබා දෙන ලෙස ඔහුට බලපෑම් එල්ල වී තිබූ බව ද මෙහිදී අනාවරණය විය.

"අල්ලස් කොමිසමේ නිලධාරීන්ට මේ මරණ මේ විදිහටම වෙයි කියලා කියන්න විශ්වයෙන් පණිවිඩ එනවාද?" යන්න ප්‍රශ්න කරන ගම්මන්පිල මහතා, නිලධාරීන් එදා ප්‍රකාශ කළ ආකාරයටම මෙම මරණය සිදු වීම බරපතළ සැකයට කරුණක් බව පවසයි. 

මෙම සිදුවීම සියදිවි නසා ගැනීමක්ද, සියදිවි නසා ගැනීමට තල්ලු කිරීමක්ද නැතහොත් ඒ සඳහා අනුබල දීමක්ද යන්න වහාම පරීක්ෂණ මගින් අනාවරණය කරගත යුතු බව ඔහු අවධාරණය කරයි.

මෙවැනි ප්‍රකාශ සිදු කළ ඉහළ නිලධාරීන් සිටී නම්, ඔවුන් සම්බන්ධයෙන් කටයුතු කළ යුත්තේ මිනීමැරුමකට සම්බන්ධ වූවන් ලෙස සලකා බව හිටපු අමාත්‍යවරයාගේ ස්ථාවරයයි. 

මීට පෙර මහ බැංකු සිදුවීමකදී ද මෙවැනිම සියදිවි නසා ගැනීමක් වාර්තා වූ බව සිහිපත් කළ ඒ මහතා, කපිල චන්ද්‍රසේන මහතාගේ මරණය සම්බන්ධයෙන් කරුණු දැක්වීමට තමන් කුලියාපිටිය පොලිසිය වෙත යන බව ද වැඩිදුරටත් සඳහන් කළේය.